Etiquettes of Ziyaratزیارات کے آداب

شدید تاکید کی گئی ہے کہ زیارت پر جائے تو آدابِ زیارت کو دھیان میں رکھتے ہوئے اس پر عمل پیرا ہو۔ زیارت کے الفاظوں اور اُس کے ترجمہ پر توجہ کرے کہ تم اپنے امامؑ سے کیا کہہ رہے ہو۔ جیسے کہ امام رضاؑ کی پہلی زیارت میں ہم امام زمانہؑ کے بارے میں کیا کہہ رہے ہیں۔۔۔

ہم اُسی وقت ان زیارتوں کے الفاظوں سے لطف اندوز ہو نگے جب ہم زندگی کے ہر اُمور میں انکی پیروی کرینگے، اور یہ تب ممکن ہے جب اہل بیتؑ کا لطف و کرم ہم پر ہو۔

انشاءاللہ! زائرین ہر زیارت کے بعد اپنی دعاؤں میں سب سے پہلے امام زمانہؑ کے جلد از جلد ظہور ہونے کی دعا کریں، اس لیے کہ امام حسن عسکریؐ نے احمد ابن اسحاق سے فرمایا: بخدا! اُس کی غیبت ہوگی تو کوئی بھی ہلاکت سے محفوظ نہیں رہے گا مگر وہ کہ جس کا ایمان ثابت قدم ہو گا اور جسے توفیق ملی تھی کہ اُس نے اپنے امامؑ کے ظہور کے لئے دعا کی تھی۔

زیارت سے پہلے غسل کرے۔

راستے میں بے ہودہ باتوں،لڑائی جھگڑے اور گالی گلوچ سے پرہیز کرے۔

ہر امام کی زیارت پڑھنے سے پہلے غسل کرے اور ان سے وارد ہونے والی دعاؤں کو پڑھے جن کا ذکر زیارتِ وارثہ سے قبل آئے گا۔

حدث اکبر واصغر سے پاک رہے۔یعنی وضو وغسل کے ساتھ رہے۔

پاک وصاف اورنیا لباس پہنے۔

جب کسی روضۂ مبارک پر جائے تو چھوٹے چھوٹے قدم اٹھائے،اطمینان کے ساتھ خضوع وخشوع کی حالت میں ادھر ادھر دیکھے بغیر آگے بڑھے۔

امام حسینؑ کی زیارت کے علاوہ دیگر زیارتوں کے لئے خوشبو لگا کر جائے۔

جب کسی روضۂ مبارک پر جائے تو چھوٹے چھوٹے قدم اٹھائے،اطمینان کے ساتھ خضوع وخشوع کی حالت میں ادھر ادھر دیکھے بغیر آگے بڑھے۔ حرم مطہر کی طرف جاتے ہوئے ذکر الہٰی تکبیر وتحمید، تسبیح وتہلیل اور محمدؐ وآل محمدؑ پر درود وصلوات سے زبان کو معطر کرے۔

حرم مبارک کے دروازے پر کھڑے ہو کر اذن دخول پڑھے اور کوشش کرے کہ اس پر رقّتِ قلب اور خشوع وخضوع طاری ہوجائے خدا کی جلالت وعظمت کا تصور کرے اور جس بزرگ ہستی کے در پر حاضر ہوا ہے اس کی بلند وبالا شان کو نظر میں لائے اور یہ یقین کرے کہ وہ بزرگوار اس کو دیکھتے ہیں اس کا کلام سنتے ہیں اور اس کو سلام کا جواب دیتے ہیں اذنِ دخول جو اس وقت زائر پڑھتا ہے ان سب کی گواہی دیتا ہے اور ان کی محبت ونوازش سے بھی یہی ظاہر ہوتا ہے وہ اپنے شیعوں سے کلام کرتے ہیں زائر کو اپنے حالات پر غور کرنا چاہیے،اپنی خرابیوں اور نافرمانیوں کو یاد کرنا چاہیے جو ان مقدس ہستیوں کے احکام کے بارے میں اس نے کی ہیں، ان اذیتوں کو نگاہ میں لائے جواس نے ان ہستیوں اور ان کے شیعوں کو پہنچائی ہیں کیوں کہ ان کے محبوں کو تکلیف پہنچانا اصل میں خود ان کو تکلیف دینا ہے،اگر انسان ان چیزوں پر توجہ کرے تو اس کے قدم آگے بڑھنے کے بجائے رک جائیں گے اس کا دل خوف زدہ وآنکھیں روئیں گی اور یہی آداب کی حقیقی روح اور جان ہے۔

علامہ مجلسیؒ نے بحار الانوار میں عیون المعجزات سے ایک روایت نقل کی ہے۔ ابراہیم جّمال جو شیعیانِ علیؑ میں سے تھے انہوں نے ہارون الرشید عباسی کے وزیر علی ابن یقطین سے ملاقات کرنا چاہی چوں کہ ابراہیم ایک ساربان تھے اور ان کی ظاہری حالت ایسی نہ تھی کہ ایک وزیر کے دربار میں جائیں لہٰذا ملازمین نے ان کو علی ابن یقطین کے پاس نہ جانے دیا۔ ادھر اسی سال علی ابن یقطین حج کو گئے اور بعد میں مدینۂ منورہ بھی آئے۔وہاں انہوں نے اپنے آقا ومولا امام موسیٰ کاظمؑ کی خدمت میں حاضری دینا چاہی تو حضرتؑ نے اس کوملاقات کی اجازت نہ دی دوسرے روز دروازے پر امام سے اس کی ملاقات ہوگئی۔

علی ابن یقطین نے عرض کی : مولا مجھ سے کیا خطا ہوئی کہ آپ نے مجھے اپنے حضور آنے کی اجازت نہیں دی؟ آپؑ نے فرمایا : تمہیں ملاقات کی اجازت نہ دینے کی وجہ یہ ہے کہ تم نے اپنے ایک مومن بھائی ابراہیم جّمال کو اپنے پاس نہیں آنے دیا تھا۔لہٰذا حق تعالیٰ تمہاری اس سعی وکوشش کو قبول کرنے سے انکار کرتا ہے۔جب تک کہ ابراہیم ساربان تمہیں معاف نہ کر دے۔ تو علی ابن یقطین نے عرض کیا : مولا میں اس وقت مدینے میں ہوں اور ابراہیم جّمال کوفہ میں ہے تو میں اس سے کیسے مل سکتا ہوں؟! آپ نے فرمایا : آج رات اپنے غلام اور اپنے ساتھیوں کو بتائے بغیر تنہا بقیع میں چلے جانا وہاں تمہیں پالان کسا ہوا ایک اونٹ نظر آئے گا۔تم اس اونٹ پر سوار ہو کر کوفہ چلے جانا۔علی ابن یقطین رات کوتنہا بقیع گئے۔ اور وہاں ویسا ہی اونٹ دیکھا تو وہ اس پر سوار ہوگئے اور تھوڑی ہی دیر میں کوفہ پہنچ گئے اور انہوں نے ابراہیم جّمال کے دروازے پر اونٹ کو بٹھایا اور پھر دروازہ کھٹکھٹایا،ابراہیم نے پوچھا :کون ہے ؟ انہوں نے کہا: میں علی ابن یقطین ہوں۔

ابراہیم بولے : علی ابن یقطین کا میرے دروازے پر کیا کام ؟انہوں نے کہا: مجھے تم سے انتہائی اہم کام ہے۔ پھر اسے قسم دی کہ دروازہ کھولے اور اندر آنے دے جب اندر گئے تو کہنے لگے: اے ابراہیم! میرے مولاؑ نے مجھے بتایا ہے کہ میرا کوئی عمل قبول نہ ہوگا جب تک ابراہیم جّمال تجھ سے راضی نہ ہو جائے،ابراہیم نے کہا: خدا آپ کو معاف کرے۔ یعنی میں نے آپ کو معاف کردیا۔ لیکن علی ابن یقطین نے اس پر اکتفا نہ کی بلکہ اپنا چہرہ خاک پر رکھ دیا اور ابراہیم کو قسم دے کر کہا : تم اپنا پاؤں میرے چہرے پر رکھ کر خوب روند ڈالو،ابراہیم نے مجبوری کی وجہ سے ایسا ہی کیا۔ تو علی ابن یقطین نے کہا: اے خدا تو گواہ رہنا!اور علی ابن یقطین اسی اونٹ پر سوار ہوئے اور اسی رات مدینہ واپس آئے اور اونٹ کو امام موسیٰ کاظمؑ کے دروازے پر بٹھایا اسی وقت آپؑ نے ان کو اندر آنے کی اجازت دی اور پھر حضرتؑ نے وہ چیزیں قبول فرمائیں جو علی ابن یقطین آپ کی نذر کرنا چاہتے تھے۔اس روایت سے معلوم ہوتا ہے کہ مؤمن بھائیوں کے حقوق کی پاسداری کس قدر لازم اور اہم ہے۔

روضۂ مبارک کی چوکھٹ پر بوسہ دے اور شیخ شہیدؒ کا ارشاد ہے : زائر اگر چوکھٹ پر خدا کے حضور سجدۂ شکر بجا لائے اور یہ نیت کرے کہ میں خداکے لئے سجدہ بجا لا رہا ہوں کیوں کہ اس نے اسے اس مقدس مقام تک پہنچنے کی توفیق دی ہے تو اس کا یہ عمل صحیح ہے۔

حرم میں داخل ہوتے وقت پہلے دایاں پاؤں اندر رکھے اور باہر آتے ہوئے پہلے بایاں پاؤں باہر نکالے۔ جیسا کہ مسجد(جانے آنے) کا حکم ہے۔

ضریح کے اتنا قریب ہو جائے کہ اس سے لپٹ سکے،یہ گمان کرنا باطل ہے کہ ضریح سے دور کھڑے ہونے میں پاس وادب ہے کیوں کہ اسے بوسہ دینے اور اس کا سہارا لینے کا تذکرہ آیا ہے۔

زیارت پڑھتے وقت پشت بہ قبلہ ہوکر اپنا منہ ضریح کی طرف کیے رہے،بظاہر یہ ادب صرف معصومؑ کے روضۂ مبارک کی زیارت کے لئے مخصوص ہے۔جب زیارت پڑھ چکے تو اپنے چہرے کے دائیں حصے کو ضریح مبارک کے ساتھ مس کرکے گریہ و زاری کرتے ہوئے خدائے تعالیٰ سے دعا مانگے،پھر بائیں حصے کو مس کرے اور صاحبِ قبر کا واسطہ دے کے دعا مانگے کہ حق تعالیٰ قیامت میں اس معصومؑ کو اس کاشفاعت گزاربنائے۔ دعا کرنے میں ہمت وحوصلے سے کام لے اور پوری توجہ کے ساتھ کافی دیر تک مصروف دعا رہے اس کے بعد ضریح مبارک کے سرہانے قبلہ رُخ ہو کر دعا کرے۔

اگر کھڑے ہو کر زیارت پڑھنے میں کوئی عذر ہو جیسے کمر درد،پاؤں کا درد یا کمزوری لاحق ہو تو بیٹھ کر پڑھے۔

جب روضۂ مقدس کو دیکھے تو زیارت پڑھنے سے پہلے تکبیر یعنی اﷲاکبر کہے۔کیوں کہ روایت میں ہے کہ جو شخص امام کے حضور تکبیر کہے اور درج ذیل ذکر کو پڑھے تو اس کو خدا اپنی عظیم رضا مقدّر فرمائے گا۔۔۔

وہ زیارتیں پڑھے جو ائمہؑ سے مروی ہیں،اپنی یا کسی اور کی بنائی ہوئی زیارتیں پڑھنے سے پرہیز کرے کہ جو بے خبر لوگوں نے اصل زیارتوں کو ترک کرکے مرتّب کیں اورنادان و بے خبر لوگوں کو انہی کے پڑھنے میں لگائے رکھتے ہیں۔ شیخ کلینیؒ نے عبد الرحیم قصیر سے روایت کی ہے : میں امام جعفر صادقؑ کی خدمت میں حاضر ہوا اور عرض کی : میرے آقا! میں نے اپنی طرف سے ایک دعا ترتیب دی ہے۔ تو آپ نے فرمایا: مجھے اپنی خود ساختہ دعا سے معاف رکھو۔یعنی یہ بے کار ہے جب تمہیں کوئی حاجت پیش آئے تو رسول اﷲؐکے وسیلے سے خدا کی پناہ مانگو اور دو رکعت نماز پڑھ کے آنحضرتؐ کے لئے ہدیہ کر دو۔

زیارت پڑھنے کے بعد نمازِ زیارت ادا کرے کہ جو کم سے کم ۲ رکعت ہوتی ہے۔شیخ شہیدؒ نے فرمایا ہے : اگر رسول اکرمؐ کی زیارت کرے تو پھر نمازِ زیارت آنحضرتؐ کے روضۂ مبارک میں بجا لائے اور اگر ائمہ طاہرینؑ میں سے کسی کی زیارت کرے تو پھر نمازِ زیارت ان کے سرہانے کی طرف ہوکر پڑھے۔ اس ۲ رکعت نماز کو مسجد میں ادا کرنا بھی جائز ہے۔علامہ مجلسیؒ نے فرمایا ہے : میرے خیال میں نمازِ زیارت اور دوسری نمازیں ضریحوں کے بالائے سر ادا کرنا بہتر ہے۔

اگر کسی موقع پر نمازِ زیارت کی خاص کیفیت کا ذکر نہ ہو تو وہاں نمازِ زیارت کی دو رکعتوں میں سے پہلی رکعت میں سورۂ الحمد کے بعد سورۂ یاسین اور دوسری رکعت میں سورۂ الحمد کے بعد سورۂ رحمٰن پڑھے اور پھر وہ دعا پڑھے جو زیارت کے بعد پڑھی جاتی ہے یا اپنی دنیا وآخرت کے لئے جو کچھ بھی چاہتا ہو اس کا سوال کرے بہتر یہ ہے کہ عام مؤمنین کے حق میں دعا کرے کہ اس کی قبولیت یقینی ہے۔

شیخ شہیدؒ نے فرمایا ہے : جب کوئی شخص حرم میں داخل ہو اور وہاں نمازِ باجماعت پڑھی جا رہی ہو تو پہلے اس میں شریک ہو کر فریضہ نماز بجا لائے اور بعد میں زیارت کرے۔اسی طرح نمازِ جماعت میں شرکت کی خاطر زیارت پڑھنے کو بھی ترک کردے اور نماز سے فارغ ہوکر زیارت پڑھے، اگر وہ زیارت پڑھ رہا ہو اور نماز کا وقت داخل ہوجائے تو بھی اسے چھوڑ کر نمازِ جماعت میں شامل ہو کیوں کہ نمازِ جماعت کے لئے زیارت کو ترک کر دینا مستحب ہے،حرم کے متولی پر لازم ہے کہ ایسے وقت میں لوگوں کو نمازِ جماعت میں شامل ہونے کا حکم دے۔

شیخ شہیدؒ نے ضریح مقدس کے نزدیک تلاوتِ قرآن کو بھی آدابِ زیارت میں ذکر فرمایا ہے اور یہ کہ اس تلاوت کو اس روح پاک کے لئے ہدیہ کرے کہ جس کی زیارت کررہا ہے،اس عمل میں زائر کا نفع اور صاحبِ مزار کی تعظیم ہے۔

زائر کو نازیبا باتوں اور بے ہودہ گفتگو سے بچنا چاہیے کہ یہ چیزیں عام حالات میں بھی نا پسندیدہ، رزق میں مانع اور دل کی سختی کا سبب ہیں خاص طور پر ان پاکیزہ روضوں میں کہ اﷲنے ان بزرگواروں کی عظمت و بلندی سورۂ نور (۲۴:۳۶) میں بیان فرمائی کہ۔۔۔

زیارت پڑھتے ہوئے اپنی آواز بلند نہ کرے۔(جیسا کہ میں نے اسے ہدیۃ الزائرین میں ذکر کیا ہے)۔

جس مقام پر کسی امامؑ کی زیارت کو گیا ہو،وہاں سے کسی دوسرے شہر یا اپنے وطن کو جانا چاہے تو روضۂ امام پر جا کر ان کو الوداع کہے اور زیارتِ وداع پڑھے جو نقل ہوئی ہے۔

اپنے گناہوں پر استغفار کرے اور زیارت سے واپس آنے کے بعد اپنے اخلاق واعمال کو سنوارے کہ زیارت سے قبل وبعد کا فرق نمایاں رہے۔

اپنی حیثیت کے مطابق خادمینِ حرم کی مالی مدد کرے،لیکن اس کے ساتھ ہی یہ ضروری ہے کہ ان آستانوں کے خدّام، شریف، نیک،دین داراور خوش اخلاق ہوں اگر زائروں کی طرف سے کوئی نامناسب بات ہوجائے تو وہ ان پر غصہ وناراضگی کا اظہار نہ کریں،بلکہ ان میں جو غریب ہوں ان کی رہنمائی سے نہ کترائیں اور انہیں زیارت کے آداب اور اعمال سے آگاہ کریں۔( خادموں کو حقیقی معنی میں خادم ہونا چاہیے، صفائی نگرانی اور زائرین کی حفاظت جیسی لازمی خدمات میں مشغول رہنا چاہیے)۔

روضۂ مطہر کے قریب میں جو محتاج ومسکین افراد خصوصاً سادات،علماء اور طلباء کہ جن کے دم سے یہ آستانے آباد ہیں،ان سب پردیسیوں کو اپنی واجب شرعی رقوم میں سے مناسب حصہ دے۔

شیخ شہیدؒ نے فرمایا ہے : زیارت کرنے کے بعد وہاں سے روانگی میں جلدی کرے اور دوبارہ یہاں آنے کا اشتیاق دل میں لے کر جائے،زیارت کرنے میں مرد اور عورتیں ایک دوسرے سے علیٰحدہ رہیں۔ تاہم عورتیں اگر رات کوزیارت کریں تو یہ بہت بہتر ہے نیز انہیں عمدہ لباس پہن کر حرم میں نہیں جانا چاہیے تاکہ وہاں موجود لوگ ان کو پہچان نہ سکیں،وہ پوشیدہ طور پر حرم سے باہر آئیں کہ کوئی ان پر نظریں نہ جمائے۔ اگرچہ عورتوں کا مردوں کے ساتھ زیارت کرنا ایک جائز امر ہے،لیکن یہ پسندیدہ طریقہ نہیں ہے۔ مؤلف کہتے ہیں : مذکورہ باتوں سے معلوم ہوتا ہے کہ موجودہ زمانے میں یہ بد تر طریقہ رواج پاگیا ہے کہ عورتیں بن سنور کر اورنفیس لباس پہن کر زیارت کے لئے گھروں سے نکلتی ہیں اور حرمِ مقدسہ میں مردوں کے ساتھ مخلوط ہو کر زیارت کرتی ہیں۔کئی مواقع پر وہ مردوں کے آگے آکربیٹھتی ہیں اور ان کی عبادت میں خلل پیدا کرتی ہیں جو اﷲ کے راستے سے روکتی ہیں۔ان عورتوں کا یہ فعل بہت برا اور ناپسندیدہ ہے حقیقت یہ ہے کہ ان کا اس ڈھنگ سے زیارت کرنا شرعی لحاظ سے بالکل مناسب نہیں اور نہ ہی یہ کارِ ثواب کے زمرے میں آتا ہے لہٰذا عورتوں کو اس بارے میں خاص احتیاط کرنا چاہیے کہ اجر و ثواب کے بجائے عذاب لے کر نہ جائیں۔

جب حرم میں قبر مبارک کے پاس کافی بھیڑ ہو، تو جو لوگ قبر کے قریب ہیں اُنہیں چاہیے کہ وہ جلد سے جلد اپنی زیارت کو تمام کریں اور دوسروں کو قبر کے قریب آنے کا موقع فراہم کریں تاکہ وہ بھی اس شرف کو حاصل کر پائیں۔

جب زائرین حرم میں داخل ہو جائیں تو اب یہ بہترین جگہ اور موقع ہے اپنے رب سے امام زمانہؑ کے جلد سے جلد ظہور ہونے کی دعا مانگیں، تو اس معاملے میں زائرین اپنی ذمہ داری سے آگاہ رہیں۔

کوئی بھی زائرامام زمانہؑ کی زیارت کو کسی بھی ائمہؑ کی قبر پر انجام دے سکتا ہے، وہ اس موقع کا فایدہ اُٹھا کر اپنے دل کو آمادہ کرتے ہوئے امام زمانہؑ کی زیارت پڑھے کہ جو اُس کی ایک اہم ذمہ داری میں سے ہے۔