17th Rabi-ul-Awwal۱۷؍ربیع الاوّل

علماء شیعہ امامیہ میں یہ قول مشہور و معروف ہے کہ یہ رسول اللہؐ کا یوم ولادت ہے اور ان کے درمیان یہ بات بھی مسلّم ہے کہ آپ کی ولادت باسعادت روزِ جمعہ طلوعِ فجر کے وقت اپنے گھر میں ہوئی جب کہ عام الفیل کا پہلا سال اور نوشیرواں عادل کا زمانۂ حکومت تھا۔ آج کے دن مسلمانوں کو خاص طور پر خوشی منانی چاہیے،وہ اس دن کی بہت تعظیم کریں،صدقہ و خیرات دیں اور مومنین کو خوش کریں۔نیز ائمۂ طاہرینؑ کے روضہ ہائے مقدسہ کی زیارت کریں سیدؒ نے کتاب اقبال میں آج کے دن کی تعظیم و تکریم کا تفصیلی تذکرہ کیا اور فرمایا ہے : عیسائیوں اور مسلمانوں کا ایک گروہ حضرت عیسٰیؑ کی ولادت کے دن کی بہت یاد کرتے ہیں، لیکن مجھے ان پر تعجب ہوتا ہے کہ کیوں وہ آنحضرتؐ کے یومِ ولادت کی تعظیم نہیں کرتے جو حضرت عیسٰیؑ کی نسبت بلند مرتبہ ہیں اور ان سے بڑھ کر فضیلت رکھتے ہیں۔

نیز۸۳؁ھ میں اسی دن امام جعفر صادقؑ کی ولادت باسعادت ہوئی لہٰذا اس دن کی عظمت و بزرگی میں اور بھی اضافہ ہوا۔

آج کے دن روزہ رکھنے کی بڑی فضیلت ہے،روایت نقل ہوئی ہے : اللہ تعالیٰ اس دن کا روزہ رکھنے والے کو ایک سال کے روزے رکھنے کا ثواب عطا فرمائے گا،آج کا دن سال کے ان چار دنوں میں سے ایک ہے کہ جن میں روزہ رکھنا خاص فضیلت و اہمیت کا حامل ہے۔

غسل کرے۔

صدقہ دیں۔

آج کے دن دور و نزدیک سے زیارت رسول خداؐ پڑھے۔

آج کے دن دور و نزدیک سے زیارت امام جعفر صادقؑ پڑھے۔

آج کے دن دور و نزدیک سے حضرت رسولؐ کی ۱۷ ربیع الاول کی زیارت پڑھے۔

اس دن امام علیؑ کی ۱۷؍ربیع الاول کی زیارت پڑھے،جو امام جعفر صادقؑ نے پڑھی اور محمد ابن مسلم کو تعلیم فرمائی تھی۔

جب سورج تھوڑا سا بلند ہو جائے تو ۲ رکعت نماز بجا لائے جس کی ہر رکعت میں سورۂ فاتحہ کے بعد ۱۰ مرتبہ سورۂ قدر اور ۱۰ مرتبہ سورۂ اخلاص پڑھے نماز کے بعد مصلیٰ پر بیٹھ کر دعا اَللّٰهُمَّ أَنْتَ حَيٌّ پڑھے۔