Merits of Rajabماہِ رجب کی فضیلت

واضح رہے کہ ماہِ رجب، شعبان اور رمضان بڑی عظمت اور فضیلت کے حامل ہیں اور بہت سی روایات میں ان کی فضیلت بیان ہوئی ہے۔ جیساکہ حضرت محمدؐ کا ارشاد ہے : ماہِ رجب خداکے نزدیک بہت زیادہ بزرگی کا حامل ہے۔ کوئی بھی مہینہ حرمت و فضیلت میں اس کا ہم پلہ نہیں اور اس مہینے میں کافروں سے جنگ و جدال کرنا حرام ہے۔آگاہ رہو! رجب خدا کا مہینہ ہے شعبان میرا مہینہ ہے اور رمضان میری امت کا مہینہ ہے۔ رجب میں ایک روزہ رکھنے والے کو خدا کی عظیم خوشنودی حاصل ہوتی ہے، غضبِ الہٰی اس سے دور ہوجاتا ہے، اور جہنم کے دروازوں میں سے ایک دروازہ اس پر بند ہوجاتا ہے۔

امام موسیٰ کاظمؑ فرماتے ہیں : ماہِ رجب میں ایک روزہ رکھنے سے جہنم کی آگ ایک سال کی مسافت تک دور ہوجاتی ہے اورجو شخص اس ماہ میں تین دن کے روزے رکھے تو اس کے لئے جنت واجب ہوجاتی ہے۔ نیز حضرتؑ فرماتے ہیں : رجب بہشت میں ایک نہر ہے جس کا پانی دودھ سے زیادہ سفید اور شہد سے زیادہ شیریں ہے اور جو شخص اس ماہ میں ایک دن کا روزہ رکھے تو وہ اس نہر سے سیراب ہوگا۔

امام جعفر صادقؑ سے مروی ہے : حضرت رسول اکرمؐ نے فرمایا: رجب میری امت کے لئے استغفار کامہینہ ہے۔ تو اس مہینے میں زیادہ سے زیادہ طلبِ مغفرت کرو کہ خدا بہت بخشنے والا اور مہربان ہے۔ رجب کو اصبّ بھی کہاجاتا ہے کیوں کہ اس ماہ میں میری امت پر خدا کی رحمت بہت زیادہ برستی ہے۔ لہٰذا اس ماہ میں کثرت سے یہ کہا کرو۔۔۔

ابن بابویہؒ نے معتبر سند کے ساتھ سالم سے روایت کی ہے کہ انہوں نے کہا: میں آخر رجب میں امام جعفر صادقؑ کی خدمت میں حاضر ہوا تو حضرتؑ نے میری طرف دیکھتے ہوئے فرمایا : اس مہینے میں روزہ رکھا ہے؟ میں نے عرض کیا :فرزندِ رسولؐ ! واﷲنہیں! تو فرمایا کہ تم اس قدر ثواب سے محروم رہے ہوکہ جس کی مقدارسوائے خدا کے کوئی نہیں جانتا کیوں کہ یہ وہ مہینہ ہے جس کی فضیلت تمام مہینوں سے زیادہ اور حرمت عظیم ہے اور خدا نے اس میں روزہ رکھنے والے کا احترام اپنے اوپرلازم کیا ہے۔ میں نے عرض کیا: اے فرزندِ رسولؐ ! اگرمیں اس کے باقی دنوں میں روزہ رکھوں توکیا مجھے وہ ثواب مل جائے گا؟ آپؐ نے فرمایا: اے سالم! آگاہ رہو! جو شخص آخرِ رجب میں ایک روزہ رکھے تو خدا اس کو موت کی سختیوں اور اس کے بعدکے خوف و خطر اورعذابِ قبر سے محفوظ رکھے گا۔جوشخص آخرِ ماہ میں دوروزے رکھے وہ پلِ صراط سے آسانی کے ساتھ گزرجائے گا اور جو آخرِ رجب میں تین روزے رکھے اسے قیامت میں سخت ترین خوف‘تنگی اورخطرات سے محفوظ رکھا جائے گا اور اس کوجہنم کی آگ سے آزادی کاپروانہ عطا ہوگا۔ واضح ہوکہ ماہِ رجب میں روزہ رکھنے کی فضیلت بہت زیادہ ہے جیساکہ روایت نقل ہوئی ہے:اگر کوئی شخص روزہ نہ رکھ سکتاہو وہ ہرروز ۱۰۰ مرتبہ یہ تسبیحات پڑھے تو اس کو روزہ رکھنے کاثواب حاصل ہوجائے گا۔۔۔

یاد رہے کہ ماہ رجب میں امام علی رضاؑ کی زیارت کو جانا مستحب ہے،جیساکہ اس ماہ میں عمرہ ادا کرنے کی بھی زیادہ فضیلت ہے اور عمرہ کی فضیلت حج کے قریب قریب ہے روایت نقل ہوئی ہے : امام زین العابدینؑ ماہ رجب میں عمرہ ادا فرماتے، خانۂ کعبہ میں نمازیں پڑھتے شب و روز سجدے میں رہتے اور سجدے میں یہ کلمات ادا فرماتے۔۔۔